ಯಲಬುರ್ಗಾ 01: ತಾಲೂಕು ಸಾರ್ವಜನಿಕರ 100 ಹಾಸಿಗೆಯ ಆಸ್ಪತ್ರೆಯಲ್ಲಿರುವ ರೋಗಿಗಳಿಗೆ ಹಣ್ಣುಹಂಪಲು ವಿತರಿಸುವ ಮೂಲಕ ಮಾಜಿ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ದಿವಂಗತ ಬಸವರಾಜ ಉಳ್ಳಾಗಡ್ಡಿ ಅವರ ಹುಟ್ಟುಹಬ್ಬವನ್ನು ಕುಟುಂಬದವರು ಹಾಗೂ ಅವರ ಅಭಿಮಾನಿಗಳು ಆಚರಿಸಿದರು.  

ಈ ಸಂದರ್ಭದಲ್ಲಿ ಮಾಜಿ ಜಿಲ್ಲಾ ಪಂಚಾಯತ್ ಸದಸ್ಯ ಈಶ್ವರ ಅಟಮಾಳಗಿ ಮಾತನಾಡಿ, ಯಲಬುರ್ಗಾ ತಾಲೂಕು ಬ್ಲಾಕ್ ಕಾಂಗ್ರೆಸ್ ಮಾಜಿ ಅಧ್ಯಕ್ಷ ದಿವಂಗತ ಬಸವರಾಜ ಉಳ್ಳಾಗಡ್ಡಿ ಅಣ್ಣನವರು ಸದಾ ಹಸನ್ಮುಖಿಯಾಗಿದ್ದರು. ಎಲ್ಲ ಮುಖಂಡರ ಜತೆಗೂಡಿ ಪಕ್ಷ ಸಂಘಟನೆಗೆ ಪ್ರಾಮಾಣಿಕ, ದಕ್ಷತೆಯಿಂದ ದುಡಿದವರು. ತಾಲೂಕು, ಜಿಲ್ಲೆಯ ಎಲ್ಲ ಕ್ಷೇತ್ರದ ಜನರನ್ನು ಪಕ್ಷಾತೀತವಾಗಿ ಅಪ್ಪಿಕೊಳ್ಳುತ್ತಿದ್ದ ಇವರು ಮನೆಗೆ ಯಾರೇ ಬಂದರೂ ಉಪಚರಿಸಿ ಅವರ ಕಷ್ಟ ನೋವುಗಳಿಗೆ ಸ್ಪಂದಿಸಿ ಸಹಾಯ ಸಹಕಾರ ಮಾಡುತ್ತಿದ್ದ ಒಳ್ಳೆಯ ವ್ಯಕ್ತಿತ್ವ ಇವರದಾಗಿತ್ತು.  

ವ್ಯಕ್ತಿತ್ವಕ್ಕೆ ಅನುಗುಣವಾಗಿ ಇಂತಹ ಕಾರ್ಯಕ್ರಮಗಳ ಮೂಲಕ ಅವರ ಹುಟ್ಟುಹಬ್ಬ ನಿಜವಾದ ಅರ್ಥವನ್ನು ಅವರ ಕುಟುಂಬದವರು ಹಾಗೂ ಅಭಿಮಾನಿಗಳು ನೀಡಿದ್ದಾರೆ ಎಂದರು. ನಂತರ ಅನೇಕ ಶೋಷಿತರು, ಬಡವರು ಮತ್ತು ನಿರ್ಗತಿಕರಿಗೆ  ಗ್ಯಾಸ್ ಒಲೆಯನ್ನು ಮತ್ತು ಆಹಾರ-ಧಾನ್ಯ ಕಿಟ್ಗಳನ್ನು ಒದಗಿಸಿದರು. ಈ ವೇಳೆ ಉಳ್ಳಾಗಡ್ಡಿ ಕುಟುಂಬದವರು ಹಾಗೂ ಅಭಿನಂದನೆಗಳು ಪಕ್ಷದ ಕಾರ್ಯಕರ್ತರು ಇದ್ದರು.